En occitan

Los collòquis internacionals Lenga e territòri, organizats a Sudbury (Canadà) en 2010, a Tbilissi (Georgia) en 2015, a Kenitra (Marròc) en 2017 e a Trent (Itàlia) en 2019, recampèron un grand nombre de cercairas e de cercaires del monde tot a l’entorn de tematicas que problematizavan los diferents contèxtes que i son interreligats lenga e territòri.

Conceptualament, los tèrmes lenga e territòri remandan totes dos a de nocions d’estructuracions socialas, d’apropriacion de l’espaci e de sentiment d’apartenéncia. Un apròchi istoriografic d’aquestas nocions permet de revelar la part d’innovacion e de practicas nòvas de las societats que las fargan. Son tanben de tèrmes fòrça polisemics que lors contorns semantics diferisson en foncion de qual los emplega, dins quin contèxte e amb quin objectiu. Las representacions que lor donan còrs son a l’encòp reveladoiras dels ligams que los unisson e de las estructuras que los bastisson. Amassa o desseparats, evòcan los escambis, los movements, los mestissatges, mas encara los replecs, los conflictes. Convidan al viatge, a la creativitat, a l’expression de se o al rescontre de l’Autre.

Dins aqueste collòqui, serà question de discutir de las diferentas formas que pòdon prene los ligams qu’unisson las lengas al(s) territòri(s) e recipròcament, de mostrar los enjòcs politics, socials, economics que naisson dels rapòrts bastits ièr o avuèi entre lenga(s) e territòri(s). Darrièr lenga e territòri, i a mai que mai d’òmes e de femnas amb lors practicas socialas e lors representacions que son al còr de las logicas constitutivas de territòris, e mai de territorialitats. De territòris novèls fan subrondar de practicas lengatgièras nòvas e, recipròcament, de practicas lengatgièras nòvas dessenhan d’espacis novèls e investits de sens. 

Las « frontièiras » que traçam entre lenga(s) e territòri(s) son pas estancas mas permeablas dins lo temps e dins l’espaci, en foncion de factors tals coma lo desplaçament de las populacions, las politicas lingüisticas, las representacions lingüisticas e socialas, l’educacion, los mèdias de massa e las valors socioculturalas.

Aquesta cinquena edicion del collòqui internacional Lenga e territòri se debanarà en territòri occitan : aquí de qué menar tot un questionament : l’occitan es una lenga que son territòri apareis pas que sus de mapas lingüisticas mai o mens exactas, que lors contorns an cambiat dempuèi los primièrs escàpols del sègle XIX. Es pas un territòri administratiu actualament identificat, e mai s’una region que ne representa lo tèrç del total s’es apropriat lo nom d’Occitània. Es pas tanpauc un territòri qu’aguèt una existéncia al cors de l’istòria : solas existissián las províncias, caduna amb una istòria diferenta, e que lors limits èran desconnectats de tot referent lingüistic. E es lo territòri d’una lenga pro diversificada localament per que l’apartenéncia a tala o tala de sas variantas pòsca faire debat. Per far cort, se podiá pas imaginar melhora illustracion de las problematicas d’un collòqui que se debanarà dins l’encastre d’un partatge largament pluridisciplinari e interdisciplinari per tal de metre en comun un encaminament sistemic e analitic sus la complexitat dels ligams e de las interfàcias lenga(s)/territòri(s). Las tematicas se poiràn inscriure dins las proposicions seguentas que constituisson pas çaquelà una lista exaustiva :  

• Lenga e territòri virtual
• Lenga, territòri e amainatjament
• Lenga, territòri e contactes
• Lenga, territòri e conflictes
• Lenga, territòri e dreit
• Lenga, territòri e economia
• Lenga, territòri e educacion
• Lenga, territòri e istòria
• Lenga, territòri e identitat
• Lenga, territòri e imaginari
• Lenga, territòri e literatura
• Lenga, territòri e minoritats
• Lenga, territòri e mobilitats
• Lenga, territòri e mondializacion
• Lenga, territòri e numeric
• Lenga, territòri e politica
• Lenga, territòri e filosofia
• Lenga, territòri e Nacion
• Lenga, territòri e Primièras Nacions
• Lenga, territòri e religion
• Lenga, territòri e malhums
• Lenga, territòri e societats
• Lenga(s) novèla(s), territòris novèl(s)
• Lenga e territòri e grafia
• Lenga « sens territòri », territòri « sens lenga »
• Lenga, territòri e patrimòni/patrimonializacion

Per participar al collòqui

Vos convidam a sometre una proposicion de comunicacion individuala o de session. Totas las proposicions seràn avaloradas anonimanent per dos membres del comitat scientific del collòqui. Vos pegam de far seguir vòstra proposicion segon lo protocòl precisat çai jos a l’adreça seguenta : https://let2021.sciencesconf.org/submission/submit. Se dispausetz pas d'un compte Sciencesconf, ne podètz crear un en clicar sul ligam seguent : https://let2021.sciencesconf.org/user/createaccount 

Comunicacion individuala :

Publicacion :

Una publicacion de las comunicacions es prevista dins la tièra monografica en sciéncias umanas que publica l’Universitat Laurentiana de Sudbury.